Անկախ նրանից՝ մեղադրյալի աթոռին նստած կլինի նախագահ, թե վարչապետ, մրցակցային դատավարությունից մի գրամ շեղում չի լինելու. Քոչարյանի գործով դատավոր
Մենք մեր դիրքորոշումը ներկայացրեցինք, թե որ փուլում ենք պատրաստ այն ներկայացնելու, բնականաբար որոշում կայացնողն այս վարույթում դատարանն է, և եթե դատարանը կորոշի, որ դատախազությունը կարող է նման միջնորդությամբ հանդես գալ, մենք չենք ընդդիմանա: Այս մասին մարտի մեկի գործով դատական նիստին հայտարարեց մեղադրանքի կողմը:
Դատախազը շարունակեց նշելով՝ ինչ վերաբերում է պաշտպանական կողմի պնդումներին քրեական վարույթը փոխելու վերաբերյալ, նախնական դատական լսումների փուլում նման ընթացակարգ նախատեսված չէ ու այդ պնդումները իրավազուրկ են:
Գործով դատավորն էլ արձագանքեց. «Ձեր ելույթից հասկացա, որ դատարանն ինքը պետք է որոշի, եթե դատարանն այս պահին որոշի և շուռ գա ձեր ուղղությամբ, թույլատրի, մրցակցության սկզբունքի որոշակի խախտում տեղի կունենա, իսկ իմ նախագահությամբ բոլոր նիստերն անկախ նրանից, թե մեղադրյալի աթոռին նստած կլինի քաղաքական գործիչ, նախագահ, վարչապետ, թե գեներալ-գնդապետ միևնույնն է, մրցակցային դատավարությունից մի գրամ շեղում չի լինելու: Հիմա եթե ունեք նման միջնորդություն դատարանը կթույլատրի, եթե չունեք, անցնենք առաջ»:
Մեղադրանքի կողմն էլ նշեց, որ ունի նման միջնորդություն, բայց դատարանի հայեցողությանն է թողնում առաջնահերթ միջնորդությունը լինի բացարակի միջնորդությունը, թե մեղադրանքի կողմի միջնորդությունը:
Հիշեցնենք, որ Հակակոռուպցիոն դատարանում արդարացումից երեք տարի անց վերաբացվել ու քննվում է ՀՀ երկրորդ նախագահ Ռոբերտ Քոչարյանի, ՀԱՊԿ նախկին քարտուղար Յուրի Խաչատուրովի, նախկին փոխվարչապետ Արմեն Գրիգորյանի և նախկին ՊՆ նախարար Սեյրան Օհանյանի վերաբերյալ քրեական գործը։ Վճռաբեկ դատարանը բեկանել էր Ռոբերտ Քոչարյանի, Յուրի Խաչատուրովի, Սեյրան Օհանյանի և Արմեն Գևորգյանի գործը կարճելու վերաբերյալ դատավոր Աննա Դանիբեկյանի որոշումը։