Իտալիայում վաճառում են շշալցված թարմ օդ` Կոմո լճից
Իտալիայի ամենագեղատեսիլ վայրերից մեկի՝ Կոմո լճի օդը «հնարավոր է շնչել»՝ գտնվելով այդ տեղանքից հազարակոր կիլոմետրեր հեռավորության վրա: Այս մասին գրում է CNN-ը՝ մանրամասնելով, որ ItalyComunica ընկերությունը վաճառում է թիթեղյա տարաներում շշալցված օդ հենց այդ վայրից:
Յուրաքանչյուր տարայի գինը 9,90 եվրո է: Ընկերության պնդմամբ՝ յուրաքանչյուրում 400 միլիլիտր «100% իսկական օդ է՝ Կոմո լճից»:
ItalyComunica-ն մանրամասնել է, որ այս արտադրանքն ավելի շատ ծառայում է որպես հուշանվեր:
Կոմո լիճը հանգստի սիրված վայր է արևմտյան շոու բիզնեսի ներկայացուցիչների շրջանում: Լոմբարդիայի զբոսաշրջության բյուրոյի տվյալներով՝ 2023 թվականին Կոմո լիճ է այցելել ավելի քան 5,6 միլիոն մարդ, և այդ ցուցանիշը հետևողականորեն աճում է: