Талғардағы адам өлімі: күдіктілердің бірінің анасы видео-үндеу жасады

16 жастағы Шерзат Болаттың өліміне қатысты қамауға алынған күдіктінің анасы видеожолдау түсірді. Видео әлеуметтік желілерде тарады, - деп хабарлайды Tengrinews.kz тілшісі.
Әйел ұлы мен оның досына қылмысты хабарламау және жасыру деген айып тағылғанын айтты. Оның айтуынша, олар қылмыс орнында болмаған. Оқиға орнына тек қылмыс болғаннан кейін барған.
Жігіттерден алдымен жауап алынып, кейін босатылған. Бірақ 13 қазанда олар қайта ұсталып, екі айға қамауға алыныпты.

"Олардың не үшін қамауға алынғанын түсінбеймін. Адам санын 13-ке толтыру керек болғандықтан ба? Егер олар оқиға орнында болмаса, олар не болғанын білмейді де ғой. Ал қылмыс кезінде сол жерде болған екі қыз неге тек куәгер ретінде аталып жүр?", - деді күдікті ретінде қамауға алынған баланың анасы.

Видеоүндеу жасаған әйел әділ тергеу жүргізіліп, ұлын үйқамаққа кепілге шығаруды сұрап отыр.
Ал Алматы облысының полиция департаменті бұл жазбаға былай жауап берді:

"13 қазанда оларға ҚР Қылмыстық кодексінің 434-бабы ("Қылмыс туралы хабарламау") бойынша айып тағылған үш адам қамауға алынды. Жүргізілген жедел-іздестіру іс-шаралары күдікті К-ның жасалған қылмыстан хабардар екені анықталды. Соттың санкциясымен ол екі ай мерзімге қамауға алынды.
Қазір қылмыстық істі толық және объективті тергеп-тексеру үшін барлық қажетті тергеу әрекеттері жүргізілуде, оның аясында қылмыс орнында болған екі қыздың әрекетіне де құқықтық баға беріледі", - делінген ведомствоның хабарламасында.

Еске салайық, Талғарда 4 қазанға қараған түні жасөспірім көз жұмды, кейінірек өңірдің полиция департаменті осы оқиғаға қатысты мәлімдеме жасады. Ал марқұм Шерзаттың отбасы бұл жайтқа қатысы барлардың бәрін ұстап, жазалауды талап етті. Қалаға ІІМ тобы жіберілді.
Сілтемесіз жаңалық оқисыз ба? Онда Telegram желісінде парақшамызға тіркеліңіз!