Париж-2024: Сенадагы парад, жамгыр алдындагы шоу

Франциянын борбору Парижде XXXIII жайкы Олимпиада оюндарынын ачылыш аземи өттү. Париж бир нече саат бою ачык асман алдындагы театрга айланды. Биринчи жолу Олимпиаданын ачылыш аземи стадиондо эмес, шаардын чок ортосунда өтүп, 200 өлкөнүн командалары Сена дарыясынан кайык менен Аустерлиц көпүрөсүнөн Йена көпүрөсүнө чейин сүзүп өтүштү. Салтанаттуу парадга 300 миңден ашуун көрүүчү күбө болду.