Гвинеяда стадиондогу тепсендиде 50дөн көп киши набыт болду

Гвинеянын түштүк-чыгышындагы Нзерекор шаарында футбол талаасындагы тепсендиде кеминде 56 киши мерт болду. Алардын арасында жашы жете электер да бар экени кабарланды.


Окуя 2-декабрда жергиликтүү "Нзерекор" командасы менен Лабе шаарынан барган футболдук команданын ортосундагы таймаш маалында болду. Оюн ортосунда арбитрдин пенальти тууралуу чыгарган чечимин күйөрмандар адилетсиз деп таап, ага карай таш, бөтөлкө ыргытып башташкан. Андан соң алар футбол талаасына чуркап чыгышкан.


Жергиликтүү ооруканаларга жараат алгандар толуп калганы маалымдалды.


Полиция тартип орнотуу максатында жаш чыгарчу газ чачып, башаламандыкты ого бетер күчөткөн. Топтолгондор стадиондон шашылыш чыгууга аракет кылып, тепсендиде калышкан. Каргаша менен коштолгон мелдеш Гвинеянын президенти Мамади Думбуянын урматына уюштурулган футбол чемпионатынын алкагында өткөн. Ал өзү бийликке 2021-жылкы куралдуу төңкөрүштүн натыйжасында келген.


Оппозиция бул үчүн Думбуяны айыптап, окуяны тыкыр иликтөөгө чакырды.


Гвинеянын коммуникация министри элге кайрылуусунда иликтөө башталганын билдирди. Думбуя өзү кырдаал боюнча үн ката элек.


Гвинея Африканын батышында жайгашкан, 12 миллиондой калкы бар мамлекет.