Орусия, Кытай жана Иран биргелешкен аскердик-деңиз машыгууларына камданууда
Орусия, Кытай жана Иран Ормуз кысыгында аскердик-деңиз машыгууларын өткөрө турганын Mehr жана Fararu маалымат агенттиктери Ирандын Аба деңиз күчтөрүнүн адмиралы Хасан Магсудлуга шилтеме кылып жазышты.
"Бул иш-чаралар эки өлкөнүн аймактагы азыркы кырдаалга олуттуу мамилесин көрсөтүп турат", - деди Магсудлу.
"Деңиз коопсуздук куру" деп аталган машыгуулар 19-февралда Сауд Арабиясы, Иран жана Ирактан мунай экспорттолуучу Ормуз кысыгында башталат.
Орусиянын Коргоо министрлиги орусиялык "Стойкий" корвети Ирандын түндүгүндөгү Бендер-Аббас портунда май куюп, даярданганын билдирди. Ал жактан кемелер Перс булуңуна чыгышат. Корветти абадан Ирандын Аба деңиз күчтөрү калкалоого алганын РБК маалымдады.
Axios басылмасы мурдараак булактарына шилтеме кылып АКШ жана Израилдин Иранга каршы аскердик операциясы жакынкы күндөрү башталарын жазган. Израилдин эки аткаминери бул бир нече күндөн эртерээк башталышы ыктымалдыгын болжолдошкон.
Axios жазгандай, Ирандын жанындагы аскер кемелерине кошумча АКШ акыркы суткаларда эле аймакка F-35, F-22 жана F-16 истребителдеринен элүүнү жеткирди. Израилдин Телеграм каналдары 48 саат ичинде Жакынкы Чыгышка 120 америкалык аскер учактары жеткирилгенин такташты. Алардын маалымдашынча, согушка Израилдин транспорттук мекемелери да даярдык көрүп жатат.
Axios булактары Иран менен Израилдин былтыр жайындагы "12 күндүк согушунан" кыйла масштабдуу согуш пландалып жатканын жана бул Ирандын режимин коркунучка кептей турганын белгилешкен.
"Башчыны мунун баары тажатты. Анын айланасында Иран менен согушка каршылар бар, бирок, менимче, бир нече жуманын ичинде аскердик аракеттерди көрүшүбүз ыктымалдыгы 90%", - деген АКШ президентинин кеңешчисинин сөзүн басылма цитата келтирди.
Булактар аскердик жаңжалды баштоого даярдыкты Иран менен өзөктүк программа тууралуу сүйлөшүүлөрдө маанилүү бир жылыш болбогонуна байланыштырууда.
АКШ Иран тарапка өз күчтөрүн 15-январдан тартып жеткире баштаган.
17-февраль күнү Дональд Трамптын күйөө баласы Жаред Кушнар жана АКШ президентинин атайын чабарманы Стив Уиткофф Женевада Ирандын тышкы иштер министри Аббас Арагчи менен үч саат жолугушкан. Эки тарап тең сүйлөшүүдө жылыш болгонун билдиришкен.