Sissel Knutsen Hegdal vurderer å gå mot fleirtalspartia i Stavanger

Sissel Knutsen Hegdal skriv i ein e-post til NRK og andre medium at ho kjem «til å ta saka til orientering i formannskapet i morgon» og eventuelt stemme for forslaget kommunedirektøren har til budsjett i Stavanger.

– Eg fekk først tilsendt eit utkast på e-post 22.11, og har behov for meir tid for å vurdere kutta som administrasjonen har foreslått opp mot forslaget frå fleirtalspartia, skriv Sissel Knutsen Hegdal i e-posten.

Høgre har saman med Venstre, KrF, Framstegspartiet, Pensjonistpartiet, og den nå uavhengige representanten Sissel Knutsen Hegdal, knappast mogleg fleirtal i bystyret i Stavanger.

Dei er derfor avhengige av Sissel Knutsen Hegdal for å få gjennom budsjettet.

– Høgre har i media uttalt at det er illojalt og vil føre til brot i samarbeidet dersom dei andre partia snakkar med meg og det har dessverre umogleggjort ein dialog undervegs i prosessen, skriv ho i e-posten.

Sissel Knutsen Hegdal sat tidlegare som ordførar for partiet, men melde seg ut etter ei einstemmig bystyregruppe bestemte at dei ikkje lengre ønskte ho som ordførar.