Новости за 28.01.2026

Татарстан Мәдәният министрлыгының еллык коллегиясендә ТР камера хоры җитәкчесе һәм дирижеры Миләүшә Тәминдарова татар телле хор жанрында белгечләргә кытлык зур булуы турында әйтте. Бу хакта «Миллиард. Татар» басмасы телеграм-каналында яза.

Татарстанда бушлай җир бирү өчен исемлеккә 72 271 күп балалы гаилә кертелгән. Узган ел азагына булган мәгълүматларга караганда, 55 439 гаилә җир кишәрлекләре белән тәэмин ителгән. Бу хакта бүген Казанда эксперт советының киңәйтелгән йомгаклау утырышында Татарстан Республикасында Кеше хокуклары буенча вәкаләтле вәкиле Сәрия Сабурская хәбәр итте.

Узган тәүлектә Казан урамнарыннан 6,8 мең тонна кар чыгарылган. Юл хәрәкәте иминлеген тәэмин итү өчен бозлавыкка каршы 1,4 мең тонна материал: 522 тонна реагент һәм 975 тонна ком-тоз катнашмасы кулланылган. Бу хакта Казан шәһәре мэриясе матбугат хезмәте хәбәр итә.

29 гыйнварда төнлә һәм көндез республикада һәм Казанда кар һәм көчле җил фаразлана. Бу хакта ТР Гидрометеорология үзәге хәбәр итте.

Татарстан Республикасы Кукмара муниципаль районының Татар Тулбасы авылында шәхси йортта янгын чыккан. Янгынны сүндергәннән соң җимерекләрне тикшергәндә 65 яшьлек ир-атның мәете табылган.

Күчемсез милеккә һәм ипотекага бәяләр өскә үрмәләгән шартларда күпләр өчен фатирлы булу буй җитмәслек хыялга әверелде. Бер квадрат метрның уртача бәясе инде күптән 200 мең сумнан артып киткән Казанда мәйданы 9 квадрат метр тәшкил иткән микрофатирларны сатуга ешрак куя башладылар, аларда йокы урыны гына түгел, душ белән бәдрәф тә бар. «Республика Татарстан» газетасы көннән-көн активлаша барган трендны өйрәнде.

Татарстанда янгын сүндерү һәм коткару техникасы паркы яңартылды. Бүген Казанда Россия Гадәттән тыш хәлләр министрлыгының ТР буенча Баш идарәсе һәм республиканың Гражданнар оборонасы эшләре һәм гадәттән тыш хәлләр министрлыгына 24 берәмлек яңа техника тапшырдылар. Яңа автомобиль ачкычларын Татарстан Премьер‑министры Алексей Песошин һәм Гадәттән тыш хәлләр министрлыгының төбәк баш комитеты башлыгы Ирек Кадамов тапшырды. Бу хакта ТР Рәисе матбугат хезмәте хәбәр итә.

Узган ел Татарстан Республикасында Кеше хокуклары буенча вәкаләтле вәкил аппаратына 8 401 мөрәҗәгать кергән. Бу хакта бүген Казанда узган киңәйтелгән йомгаклау утырышында Татарстан Республикасында Кеше хокуклары буенча вәкаләтле вәкил Сәрия Сабурская хәбәр итте.

11 февральдә Казанның тугызынчы сыйныфларында белем алучы 16 мең 102 укучы рус теленнән йомгаклау әңгәмәсе узачак. Телдән имтихан биремнәрен уңышлы үтәү дәүләт йомгаклау аттестациясенә кертелергә рөхсәт булып тора.

20 февральдән 23 февральгә кадәр бәйрәм яллары чорында Россия туристлары арасында Казанга сәфәрләргә ихтыяҗ 54 процентка арткан. Бу хакта «Татар-информ»га «Островок» сервисы экспертлары хәбәр итте.

«Кадрлар» илкүләм проекты кысаларында 2026 елда бушлай яңадан укыту өчен һөнәрләр исемлеге билгеләнде. Бу хакта Россия Хезмәт һәм социаль яклау министрлыгының матбугат хезмәте хәбәр итә.

Эш бирүче, әгәр хезмәткәрнең хезмәт вазифасында әлеге пункт булмаса, хезмәткәрне кар чистартырга мәҗбүр итәргә хокуклы түгел. Бу хакта «Татар-информ»га юридик фәннәр докторы, Россиянең атказанган юристы Иван Соловьев хәбәр итте.

Россия Банкы рәисе Эльвира Нәбиуллина әйтүенчә, 10 ай эчендә 21 миллион кеше үз-үзләренә кредит алуны тыйган. Мәгълүмат Күпфункцияле үзәк Бөтенроссия форумында яңгырады, дип хәбәр итә РИА новости.

Дәүләт һәм муниципаль хезмәткәрләр эштә бүләкләр кабул итәргә тиеш түгел. Бу хакта бүген «Татар-информ»да узган матбугат конференциясендә ТР Рәисе Коррупциягә каршы сәясәт мәсьәләләре буенча идарәсенең коррупциягә каршы тикшерүләр бүлеге мөдире Равия Шрша искәртте.

29 гыйнвардан 1 февральгә адәр Казанның Спорт сараенда фигуралы шуу буенча Россия Кубогының 3 нче этабы һәм Россия күләмендәге «Сөембикә» ярышлары уза. Әлеге чараларда илнең 19 төбәгеннән 50 команда катнашыр дип көтелә. Бу хакта Казан мэриясе матбугат хезмәте хәбәр итә.

Торак-коммуналь хезмәтләр өчен бурычлар булу өйдән куып чыгару өчен соңгы чара булып тора һәм суд карары буенча гына кулланыла, дип хәбәр итте Дәүләт Думасы депутаты Александр Якубовский.

MAX илкүләм мессенджеры дөньяда иң тиз үсә торган интернет-сервислар бишлегенә кергән. Аның аудиториясе 89 миллион кулланучыга җиткән, шуларның 60 миллионы көн саен кушымтага керә. Бу хакта РФ Президенты Администрациясе җитәкчесенең беренче урынбасары Сергей Кириенко белдерде, дип хәбәр итә ТАСС.

«Созвездие-Йолдызлык» фестивале быел конкурс тыңлауларыннан түгел, ә белем бирү этабыннан башланды. Сәхнәгә чыгар алдыннан бөтен республикадан йөзләгән яшь артист «иҗади лабораторияләр»дә – Менделеевск, Әгерҗе, Апас, Түбән Кама, Аксубай һәм Яңа Чишмә шәһәрләрендә күчмә мастер-класслар сериясендә катнашты.

Татарстан Рәисе Рөстәм Миңнеханов Тарихи җирлекләрдә шәһәр төзелеше эшчәнлеге мәсьәләләре буенча ведомствоара комиссия утырышын уздырды. Бу хакта ТР Рәисе матбугат хезмәте хәбәр итә.

5 июньдә Казанның Иске Татар бистәсендә Идел буе халыкларының әкияти фольклоры темасына багышланган «Манзара» урам биюе һәм театрының беренче фестиваль-бәйгесе уздырыла. Шәһәрнең тарихи үзәгендә иң яхшылар исеме өчен бөтен Татарстаннан 500 катнашучы көч сынашачак. Фестивальдә катнашу өчен гаризалар 28 февральгә кадәр кабул ителә, дип яза Казан мэриясе матбугат хезмәте.

31 гыйнварда Ютазы районының Урыссу бистәсендә Татарстан Диния нәзарәте мәгариф оешмаларында белем алучылар арасында «Татар-мөселман кызы 2026» Республика конкурсы уза. Чараны Татарстан Республикасы Рәисе каршындагы татар телен һәм Татарстан Республикасында яшәүче халыкларның туган телләрен саклау, үстерү мәсьәләләре буенча комиссия ярдәме белән Ютазы районы мөхтәсибәте һәм Урыссуның «Фәнис» мәдрәсәсе оештыра. Бу хакта ТР Диния нәзарәте матбугат хезмәте хәбәр итә.

Синоптиклар фаразлавынча, бүген Татарстанда тизлеге 18 метрга кадәр җитәчәк көчле җил һәм буран көтелә, күз күреме 1000 метрга кадәр начарлана.

Татарстанда РФ Саклану министрлыгы белән, шул исәптән пилотсыз системалар гаскәрләрендә хезмәт итүгә контракт төзүчеләргә, өч меңнән артык ташлама гамәлдә. Алар арасына айлык түләүләргә өстәмәләр каралган хәрби хәрәкәтләр ветераны статусы; тормыш һәм сәламәтлекне иминиятләштерү һәм түләүсез тикшерүне дә кертеп, медицина учреждениеләрендә дәвалану керә.

Татарстан декабрьдә ипотека кредитлары бирү күләме буенча лидер-төбәкләр бишлегенә керде: республикада банклар 29,43 млрд сумлык 6,12 мең ипотека рәсмиләштергән, ноябрь белән чагыштырганда күрсәткечләр саны 62 процентка һәм күләм 66 процентка арткан. Бу хакта Берләшкән кредит бюросы мәгълүматлары сөйли.

24-25 гыйнвар көннәрендә Филология һәм мәдәниятара багланышлар институтында тәүге тапкыр Татарстан Республикасының 10-11 сыйныф укучылары өчен «Гыйлем» интеллектуаль конкурсы узды. Бу хакта КФУның Филология һәм мәдәниятара багланышлар институты матбугат хезмәте хәбәр итә.