Казан мэры махсус операция зонасындагы хәрбиләргә бронежилетлар һәм генераторлар җибәрде
Махсус операция зонасындагы Татарстан хәрбиләре тиздән Казан мэры Илсур Метшин тәкъдим иткән махсус җиһазларның яңа партиясен алачак.
Комплектка тепловизорлар, портатив радиостанцияләр, бронежилетлар, коллиматор төзәгечләр, дизель һәм бензин белән эшли торган электр генераторлары, йоклау капчыклары һәм медицина аптечкалары кергән. Исемлек хәрбиләр һәм аларның якыннарының сораулары нигезендә төзелгән.
Фото: © Казан мэриясе
Мондый төрдәге махсус кирәк-яраклар махсус операция зонасына даими рәвештә җибәрелә. Хәрбиләргә сигез транспорт чарасы, шул ук сандагы запас аккумуляторлары булган 121 радиостанция, 111 оптик төзәгеч, автомат мылтык өчен 119 беркеткеч, 70 тактик медицина комплекты, 49 тепловизор һәм 31 төнлә күрү приборы тапшырылды инде. Моннан тыш, хәрбиләрнең көнкүреш шартларын яхшырту өчен җиһазлар һәм кораллар җибәрү буенча сораулар килә.
Өстәмә рәвештә, һәр ай ярым-ике ай саен Казаннан Лисичанск һәм Рубежноега әлеге шәһәрләрдә яшәүчеләр өчен гуманитар ярдәм төялгән йөк машиналары юлга кузгала.