Казанда билбордларда Бөек Ватан сугышы катнашучыларының фотоларын урнаштырдылар

Бөек Ватан сугышында Җиңүнең 79 еллыгы уңаеннан Татарстан башкаласының ун билбордында ветераннарның фотолары урнаштырылды. Бу хакта Казан мэриясенең матбугат хезмәте хәбәр итә.

Билбордлар Ибраһимов, Ямашев һәм Җиңү проспектларында, Чистай, Арбузов, Гвардия урамнарында, Оренбург трактында һәм башка участокларда урнашкан.

Билбордларда тормышы Казан белән бәйле булган Бөек Ватан сугышы катнашучылары сурәтләнгән. Алар арасында Александр Шахназаров, Харис Салихов, Алексей Комлев һәм Александр Малов бар.

Искәртик, Бөек Ватан сугышында катнашучы һәм тыл хезмәтчәннәренең портретларын бөтен Россия буенча телеканалларда, медиафасадларда һәм шәһәр экраннарында трансляцияләү быел «Үлемсез полк» акциясен үткәрүнең төп форматларының берсе була.

«Үлемсез полк» акциясенә кушылып, «Ак Барс Арена» стадионы медиафасадында Бөек Ватан сугышы ветераннары портретларын күрсәтәләр. Сугышта катнашучы һәм тыл хезмәтчәннәренең фотолары бүген иртәнге 8:00 сәгатьтән 23:00 сәгатькә кадәр чыгып торачак.