Рөстәм Миңнеханов: Алексеевск-Әлмәт трассасының 70 проценттан артыгы төзелгән

Алексеевск-Әлмәт тиз йөрешле түләүле трассасының 70 проценттан артыгы төзелгән. Бу хакта Татарстан Республикасы Рәисе Рөстәм Миңнеханов төзелә торган юл буйлап сәфәрдән соң Тelegram-каналында сөйләде.

«Ел азагына кадәр йөз кырык биш километрлы дүрт полосалы юл тапшырылырга тиеш. Бөтен юл буйлап коймалар урнаштырыла, яктырту куела. Көн саен 6,5 километрга кадәр асфальт салалар, җәйге чорда 10 километрга кадәр арттырачакбыз», – дип хәбәр итә республика җитәкчесе.

«Барлык эшләр дә график буенча бара. Техник яктан катлаулы объектларның берсе – Чишмә елгасы аша күпер. Бүген анда тукталыш ясалган, киләсе ике айда эш тәмамланырга тиеш», — дип аңлатты ТР Рәисе.

Моннан тыш, Миңнеханов сүзләренчә, трассадагы асфальтның сыйфаты бик яхшы — тикшерүчеләр бөтен участокны бер сәгать эчендә үткән. Рәис шулай ук үзенең сәфәреннән видео урнаштырган.

Шәле (М7)-Баулы (М5) трассасы составындагы Алексеевск-Әлмәт түләүле юлының гомуми озынлыгы 145 километр тәшкил итәчәк. Проект «Европа-Көнбатыш Кытай» халыкара транспорт коридорының бер өлеше була, ул дәүләт-шәхси партнерлык механизмын кулланып гамәлгә ашырыла.

Башта эшләрнең бәясе 83,6 миллиард сумга бәяләнгән, ә соңыннан 102 миллиард сумга җиткән. Агымдагы елда бу эшләргә 22,4 миллиард сумнан артык акча юнәлтеләчәк.