Рөстәм Миңнеханов «Татарстан – яңа гасыр» берләшмәсен 25 еллыгы белән котлады

Татарстан Рәисе Рөстәм Миңнеханов «Татарстан - яңа гасыр» Республика иҗтимагый хәрәкәтендә катнашучыларны берләшмәнең 25 еллык юбилее белән тәбрик итте. Югары совет утырышында аның котлау сүзләрен ТР Рәисе Администрациясе җитәкчесе урынбасары Руслан Мөхәрләмов тапшырды.

Миңнеханов үзенең юлламасында билгеләп үткәнчә, берләшмә иҗтимагый-сәяси тотрыклылыкны, милләтара тынычлык һәм татулыкны ныгытуга, республикабызның чәчәк атуына йөз тота. Моннан тыш, ул беренче сезонда формалаштырылган максатны - көчле һәм имин Татарстан, көчле Россия - эзлекле рәвештә гамәлгә ашыра.

«Бүген меңләгән кешене берләштергән «Татарстан - яңа гасыр» хәрәкәте республикада иң зурлардан санала һәм ул үзенең күпкырлы эше белән лаеклы абруй казанды. Өлкән буынга, сәламәтлек мөмкинлекләре чикле балаларга һәм авыр тормыш хәлендә калучыларга ярдәм итү, ветераннар турында кайгырту һәм Бөек Ватан сугышы турында хәтерне саклау, шулай ук үсеп килүче буынны тәрбияләү, сәламәт яшәү рәвешен пропагандалау - аның эшчәнлегенең үзгәрешсез юнәлешләре», - диелә Миңнехановның чыгышында.

ТР Рәисе шулай ук махсус хәрби операция шартларында Ватанны саклаучыларга ярдәм итү, гуманитар ярдәм җыю буенча оешманың патриотик позициясен билгеләп үтте.

«Зур хезмәт һәм кешеләрне чын күңелдән хөрмәт итү шушы игелекле эшләрнең нигезендә ята. Хәрәкәттә катнашучылар, элеккеге кебек үк, актив гражданлык позициясен күрсәтер һәм җиденче чакырылыш Татарстан парламентын формалаштыруда катнашыр дип ышанам», - диде ТР Рәисе утырышта катнашучыларга.