Казандагы төтен торбасын мәдәни мирас объекты дип таныячаклар

Казанның Гладилов урамындагы төтен торбасын мәдәни мирас объекты дип таныячаклар. Дәүләт тарихи-мәдәни экспертиза актын ТР Мәдәни мирас объектларын саклау комитеты бастырып чыгарган.

Объект шәһәрнең Киров районындагы Алафузовның элеккеге җеп эрләү мануфактурасы (совет елларында – җитен комбинаты) биналар комплексына карый.

Документлар нигезендә, төтен торбасы 1895 елда төзелгән. Ул сигез кырлы, кирпечтән салынган, ике катлы җитештерү бинасына орынып тора.

Экспертиза объектта корылманың фрагментлары һәм кирпечләре югалу, кителеп төшкән урыннар һәм кирпечләренең буялуы кебек җитешсезлекләр булуын күрсәткән.

Шуңа да карамастан, объект тарихи кыйммәтен саклап калган – ул күренекле рус сәүдәгәрләре, сәнәгатьчеләр, Алафузовларның җитен комбинаты һәм күн заводына нигез салучылар тарихы белән бәйле.