Татарстанда кабат яшен һәм көчле җил көтелә
Иртәгә, 8 августта, Татарстанда температура төшү фонында һава шартлары начарлануы фаразлана. Бу хакта Татарстан Гидрометеорология һәм әйләнә-тирә мохитне күзәтү үзәге хәбәр итә.
Дүшәмбе көндез һәм кич республикада урыны белән яшен көтелә. Төньяк-көнбатыштан көчле җил, ул секундына 15-18 метр тизлектә исәчәк, дип билгеләп үтә синоптиклар.
«Татар-информ» хәбәр иткәнчә, атмосфера фронты узганнан соң Татарстанда аномаль эсселекне уңайлырак һава торышы алмаштырды. Бүген төбәктә һава температурасы +30 градустан артмаячак дип фаразлана.