Питрәчнең Ленино-Кокушкино авылында яшь көрәшчеләрне һәм аларның тренерларын бүләкләделәр

Питрәч районы Ленино-Кокушкино авылында Бөтенроссия һәм республика ярышларында иң яхшы нәтиҗәләргә ирешкән яшь спортчы-көрәшчеләрне һәм аларның тренерларын бүләкләделәр. Бу хакта «Алга» сайтында Илшат Гайсаров хәбәр итә.

Аларны районда милли көрәш федерациясе рәисе, «Ак барс-Питрәч» авыл хуҗалыгы предприятиесе директоры Радик Зиннәтов котлады һәм акчалата премияләр тапшырды. Ул үзе элек хоккей, футбол уйнаган, хәзер ат спорты белән мавыга. Бүләкләү вакытында спорт һәм физкультураның, бигрәк тә балалар һәм яшьләр өчен мөһимлеген билгеләп үтте.

Югары категорияле тренер, район Сабан туеның өч тапкыр абсолют батыры, 2021 елда билбаулы көрәш буенча дөнья кубогының көмеш призеры Андрей Чиндинда 40тан артык бала шөгыльләнә. Ул аларны ирекле көрәшкә һәм билбау көрәше белән шөгыльләнергә өйрәтә. Дөнья чемпионы Ксения Демидова да анда шөгыльләнә. Бүләкләнүчеләр арасында спорт мастерлыгына кандидатлар Ксениянең сеңлесе Елизавета Демидова һәм Илүзә Җәләлова бар иде.

Елизавета быел Бөтенроссия ярышлары һәм Татарстан чемпионы булды. Мамадышта республиканың соңгы беренчелегендә барлык көрәшләрдә җиңеп, лаеклы рәвештә чемпион исемен яулады. Илүзә дә быел Татарстан һәм Бөтенроссия ярышлары чемпионы булды, Россия беренчелегендә өченче урынны алды.

Рияз Сөнгатуллин һәм Владислав Жестков Алмаз Галимҗановта көрәш белән шөгыльләнә. Рияз быел республика беренчелегендә икенче урынны яулады, төрле ярышларда җиңүче һәм призер булды. Аны көрәшкә әтисе Марсель Мансурович алып килә, ул үзе дә район җыелма командасы әгъзасы булып тора. Аның олы улы Инсаф район җыелма командасы составында егетләр арасында көрәшә, ә кечесе – 7 яшьлек Дияз быелТеләче районы ярышларында өченче урынны алды.

Владислав Жестков Казан беренчелегендә өченче призер булды, шулай ук төрле ярышларда җиңүче һәм призер булып тора.

Ахырда яшь спортчылар һәм аларның тренерлары Радик Зиннәтовка игътибары һәм ярдәме өчен рәхмәт белдерде.