Ростов-на-Донуда заманча Татарстан киносы фестивале узды
Ростов-на-Дону бу ялларда Татарстан киноиндустриясе вәкилләрен кабул итте. Алар биредә Татарстан киносы фестивалендә тамашачыларга үзләренең күренекле кинокартиналарын тәкъдим иткән. Бу хакта Бөтендөнья татар конгрессы хәбәр итә.
Фестиваль «823 километр», «Мишка» һәм «Без 41 ел балалары» дигән өч картинаны берләштергән һәм шул рәвешле кино сәнгате призмасы аша Татарстан Республикасының бай мәдәни мирасы белән танышу өчен уникаль мөмкинлек биргән.
14 июльдә Ростов-на-Донуның «Чарли» кино челтәре экранында Татарстанның талантлы режиссерлары иҗат иткән төрле нәфис фильмнар күрсәтелгән. Тамашачылар куючылар, актерлар һәм операторларның осталыгын бәяли, шулай ук татар халкының рухы һәм традицияләре белән таныша алган.
Балалар аудиториясенә аерым игътибар бирелгән. Алар өчен «Мишка» фильмын махсус күрсәтү оештырылган. Яшь тамашачылар өчен әлеге фильм балаларның күңелен күреп кенә калмый, ә аларда гомумкешелек кыйммәтләре һәм сәнгатькә мәхәббәт тәрбияли. Шулай ук «Боше-Парк Вавилония» күңел ачу үзәгендә балалар һәм әти-әниләр өчен уеннар һәм күңел ачулар өчен вакыт та оештырылган.
Продюсер, Татарстан Республикасының атказанган сәнгать эшлеклесе, «Татаркино» дәүләт бюджет мәдәният учреждениесе директоры Миләүшә Айтуганова һәм «823 километр» фильмының сценаристы Валерия Байкеева белән иҗади очрашу фестивальнең иң якты мизгелләренең берсе булган. Очрашуда катнашучылар сәнгать осталары белән аралашып кына калмаган, фильмнар һәм иҗади планнарга кагылышлы кызыксындырган сорауларын да бирә алган.
Фестивальне Татарстан Республикасы Мәдәният министрлыгы һәм Татарстан Республикасының «Татаркино» дәүләт бюджет мәдәният учреждениесе оештырган. Ростов-на-Донуда чара «Чарли» кино челтәре һәм «Якташлар» татар-башкорт мәдәни үзәге» Ростов өлкәсе иҗтимагый оешмасы ярдәмендә үткәрелгән.
Татарстан киносы фестивале ике төбәкне тоташтырган һәм Ростов-на-Дону халкын Татарстан Республикасы кинематографистларының уникаль иҗаты белән таныштырган мәдәни күпер булды. Чара мәдәниятара элемтәләр һәм үзара аңлашуны ныгытуга бәяләп бетергесез өлеш кертте, диелә хәбәрдә.