Цифрлар министрлыгы: «Дәүләт хезмәтләре» порталы аша фатирларны урлау мөмкин түгел

Мошенниклар «Дәүләт хезмәтләре» аша фатир сатып алу яки сату буенча ялган килешү үткәрә алмаячак. Порталда моның өчен кирәкле функционал юк, дип сөйләделәр Россия цифрлар министрлыгының матбугат хезмәтендә.

«Мошенниклар «Дәүләт хезмәтләре» аша чит фатирны үзенеке итә ала, дигән хәбәр – ялган. Порталда күчемсез милекне сатып алырга яки сатарга мөмкинлек бирә торган функционал юк», — дип ассызыклыйлар ведомствоның телеграм-каналында.

Россия халкы портал ярдәмендә Росреестрга милек хокукын теркәү өчен гариза бирә ала. Ведомствода җентекле тикшерү уздырганнан соң гына гаризаны кабул итү-итмәү турында карар кылалар.

Моннан тыш, мошенниклар «Дәүләт ачкычы» кушымтасында ялган электрон имза ясый яки моның өчен чит имзаны куллана алмаячак. Сертификат алу өчен һәр яңа җайланмада теркәлергә, керүне, телефон номерын расларга, сигез санлы пароль уйлап табарга һәм, иң мөһиме, документлар ярдәмендә онлайн яки килеп шәхесеңне расларга кирәк.

«Кушымтага кергән саен сигез санлы пароль җыярга кирәк. Аны яңадан булдыру яки үзгәртү мөмкин түгел, моны сертификатны юк итмичә эшләп булмый. Ул очракта электрон имза сертификатын яңадан ясатырга һәм шәхесне расларга кирәк булачак», - дип өстәделәр Россия цифрлар министрлыгында.

Моннан тыш, «Дәүләт хезмәтләре» кулланучылары килешү төзегәндә милекче шәхсән үзе катнашмаган очракта күчемсез милеккә карата теркәлү гамәлләре башкаруны тыю турында гариза белән Росреестрга мөрәҗәгать итә ала. Бу мөлкәтне өстәмә рәвештә сакларга мөмкинлек бирә.

Элегрәк массакүләм мәгълүмат чараларында күчемсез милек хуҗасының электрон имзасына ия булган явыз ниятле җинаятьчеләр, янәсе, «Дәүләт хезмәтләре» порталы аша чит фатирларны үзенеке итәргә мөмкин, дигән хәбәрләр барлыкка килде.