Мамадыш районында Дәүләт Думасы депутатларыннан почта проблемасын хәл итүне сорадылар
VII чакырылыш Татарстан Дәүләт Советына сайлаулар алдыннан «Бердәм Россия» брендлы микроавтобуслары республиканың шәһәр һәм авыллары буйлап йөрүен дәвам итә. Агитация проекты кысаларында Татарстан халкына Дәүләт Советына депутатлыкка кандидатлар һәм сайлаулар турында сөйлиләр, шулай ук аларны борчыган мәсьәләләр буенча тәкъдимнәр җыялар. Көн саен, дүшәмбе һәм сишәмбедән кала, агитаторлар 15 торак пунктны йөреп чыга. Бүген шуларның берсе Мамадыш районының Кече Сон авылы булды, дип хәбәр итә «Бердәм Россия»нең төбәк бүлеге матбугат хезмәте.
Мамадыш районына Дәүләт Думасы депутатлары Анатолий Иванов (муниципалитетның элеккеге башлыгы) һәм Илья Вольфсон килде.
Кече Сон авылы халкы парламентарийларга җирле почта бүлегенең инде берничә ай дәвамында эшләмәвенә зарланган, хезмәт хакы түбән булу сәбәпле почтаның барлык хезмәткәрләре эштән киткән. Коммуналь хезмәтләр өчен түләү яки хат җибәрү өчен авыл халкына Мамадышка барып йөрергә туры килә.
Авылның тормышын яхшырту өчен иң беренче чиратта кирәкле үзгәреш буларак җирле халык шулай ук юлларны ремонтлауны атады. Авылга бердәнбер керү юлы җимерелгән, юл өлеше чокыр-чакырдан гына тора. Авыл халкы җәйге чорда су җитмәүне дә телгә алды. Аларның сүзләренә караганда, бөтенесе бакчаларында үстергән яшелчәләренә су сибә башлагач, хәл начарая төшә.
«Мондый очрашулар бик мөһим, алар даими булырга тиеш, чөнки безгә шәһәр халкын гына түгел, ә ерак авыллар һәм салаларда яшәүчеләрне дә нинди проблемалар борчуын күрергә кирәк. Кешеләр мәнфәгатьләрен кем яклаячагын белергә тели», - дип игътибар юнәлтте Илья Вольфсон.
«Авылның ничек яшәвен шәхси очрашулар аша гына тоярга мөмкин. Безнең бурыч – кешеләргә якынаю, конкрет проблемаларны хәл итәргә әзер булу. Безнең эшне халык бәяли. Шуңа күрә без татарстанлыларның кәефен, ихтыяҗларын һәм теләкләрен белергә омтылабыз. Бүген көн тәртибендә нәрсә торганын билгеләргә һәм хәлне үзгәртү өчен алдагы адымнарны уйларга кирәк», - дип белдерде Мамадыш районының элеккеге башлыгы Анатолий Иванов.
- Бердәм республика сайлау округы буенча «Бердәм Россия» партиясеннән кандидатка сорау яки тәкъдимеңне «Минем депутат» онлайн-сервисы аша калдырырга мөмкин. Үз соравын бирү өчен гражданинга kandidat.tatar сайтыннан файдаланырга яки эш көннәрендә 10:00 сәгатьтән 19:00 сәгатькә кадәр 8 (800) 222-17-08 телефоны буенча шалтыратырга кирәк. Сервис белән эш итүдә агитация бригадалары стоянкаларында да ярдәм күрсәтәчәкләр.