Владимир Путин диңгез державасы булган Россия өчен горурлык турында әйтте

Россия диңгез державасы булып санала һәм Хәрби Диңгез флоты көнендә аның өчен аеруча горурлык хисләре туа. Бу хакта Россия Президенты Владимир Путин Санкт-Петербургта Төп хәрби-диңгез флоты парадын кабул иткәндә әйтте, дип яза Кремльнең матбугат хезмәте.

«Без бу бәйрәмне һәрвакыт тантаналы итеп, данлыклы флотка мәхәббәт һәм хөрмәт, диңгез державасы булган илебез өчен горурлык белән уздырабыз», – диде дәүләт башлыгы һәм Баш командующий.

«Россия бу әһәмиятле статусны үзенең геополитик хәле, бөек географик ачышлары һәм Дөнья океанын өйрәнүгә керткән гаять зур өлеше, әмма иң мөһиме – безнең флотчыларның һәм хәрби диңгезчеләрнең җиңүләре, хезмәте, ихтыяр көче, батырлыгы һәм таланты белән иреште», – дип өстәде ул.

Аңа кадәр Путин, Россиянең оборона министры Андрей Белоусов һәм Хәрби Диңгез флотының баш командующий адмирал Александр Моисеев белән Нева елгасы буйлап тезелгән хәрби корабльләр (шул исәптән чит илнекеләрне дә) парады линиясен катерда карап чыкты. Президент экипажларның шәхси составын бәйрәм белән котлады, дип яза ТАСС.

«Хәрби Диңгез флоты көнен бәйрәм итүдә катнашыгыз белән котлыйм», – дип мөрәҗәгать итте Путин чит ил корабльләре экипажларына.

2024 елгы парадта катнашу өчен барлыгы 20 су өсте корабле һәм катер, бер су асты көймәсе («Можайск»), җилкәнле дүрт судно (алар арасында – «Полтава» линияле корабле дә бар) һәм 2,5 меңнән күбрәк хәрби җәлеп ителгән.