Валентина Матвиенко Россиядә микрофинанс оешмалары эшен тыярга тәкъдим итте

Федерация Советы Рәисе Валентина Матвиенко парламентның югары палатасы каршындагы Финанс базарын үстерү советы утырышында Россия банкын ил территориясендәге барлык микрофинанс оешмалары эшчәнлеген тыярга чакырды. Бу хакта ТАСС хәбәр итә.

«Мин инде телевизордан микрофинанс оешмаларында кредит алучы, фатирларын бирүче кешеләрнең менә бу коточкыч фаҗигаләрен карый алмыйм. Сез, Эльвира Сәхипзадовна (Нәбиуллина), өстәмә көйләү кирәк дидегез. Ә аларны бөтенләй ябарга ярамыймы?» - дип кызыксынды Матвиенко.

Сәясәтче фикеренчә, микрофинанс оешмаларының кешеләрне ничек алдавын һәм аларның клиентларының «реаль капкынга эләгүен, әмма барысы да закон буенча» булуын күзәтеп торып булмый.

Үз чиратында Үзәк банк рәисе Эльвира Нәбиуллина белдергәнчә, хәзер рәсми микрофинанс оешмалары булып легаль булмаган кредиторлар эшли, алар бурычларны түләтүнең хокуксыз ысулларын кулланырга мөмкин.

Шуның белән бергә, регулятор җитәкчесе фикеренчә, легаль һәм контрольдә тотыла торган микрофинанс оешмалары эшчәнлеген тыю аларның да «күләгәгә китүенә» генә китерәчәк.