Казанда көзге авыл хуҗалыгы ярминкәләрен 14 сентябрьдә ачарга ниятлиләр

Казанда традицион көзге авыл хуҗалыгы ярминкәләре 14 сентябрьдә башланырга һәм 29 декабрьгә кадәр дәвам итәргә мөмкин. Казан башкарма комитетының карар проекты коррупциягә каршы экспертиза уза.

Казанлыларның фермерлар һәм Татарстан җитештерүчеләренең продукциясен Авиатөзелеш һәм Киров районнарында – өч, Вахитов районында – бер, Яңа Савин, Совет һәм Идел буе районнарында ике мәйданчыкта сатып алу мөмкинлеге булыр дип көтелә.

Документ шулай ук ярминкәләрне әзерләү һәм үткәрү буенча оештыру комитетының составын да билгеләячәк. Аның рәисе сыйфатында Казан башкарма комитеты җитәкчесе урынбасары Илдар Шакиров, ә урынбасары сыйфатында башкарма комитетның Кулланучылар базары комитеты башлыгы Руслан Фазылҗанов күрсәтелгән. Составка Казан районнары, «Иске шәһәр» префектурасы җитәкчелеген, шулай ук шәһәрнең Тышкы төзекләндерү комитеты, ТР Авыл хуҗалыгы һәм азык-төлек министрлыгы, Дәүләт ветеринария берләшмәсе һәм РФ Эчке эшләр министрлыгының Казан шәһәре буенча идарәсе, Эчке эшләр министрлыгы Казан шәһәре буенча идарәсенең ЮХИДИ бүлеге вәкилләре кертеләчәк.