Татарстан Лисичанск һәм Рубежноедан балаларның икенче сменасын Кырымга озатты

Татарстан Лисичанск һәм Рубежноедан балаларның икенче төркеме өчен Кырымга ял оештырды. 231 бала 24 педагог озатуында Фороста урнашкан «Сәләт-Ак Барс» яшьләр үзәгенә юл тотты. Бу турыда «Татар-информ» яза.

Татарстан Премьер-министры урынбасары Фәнил Әһлиуллин төркемне озатуда шәхсән катнашты, мәктәп укучыларына яңа уку елы алдыннан яхшы ял итү һәм көч туплау теләде.

Ял программасына Кара диңгез буенда яшәү, спорт һәм күңел ачу чараларында катнашу, шулай ук танып-белү экскурсияләре кергән.

«Ял вакытында балалар спортта уңышларга ирешеп кенә калмыйча, тәҗрибәле вожатый-тренерлар җитәкчелегендә тупланган командага әверелеп, яңа дуслар да табар дип өметләнәм», - диде Фәнил Әһлиуллин.

Искәртеп узабыз, элегрәк 225 бала бу үзәктә оештырылган беренче сменадан кайтты, анда спорт белән актив шөгыльләнделәр, төрле чараларда катнаштылар. Спорт инфраструктурасын үстерүдә бай тәҗрибәгә ия Татарстан, балалар өчен шундый сәфәрләр һәм программалар оештырып, бу тәҗрибәне шефлыкка алган төбәкләр белән дә уртаклашырга омтыла.