Татарстанда быел 11 мәктәп бинасы һәм 10 балалар бакчасы төзеләчәк

Татарстанда быел 1 сентябрьдә 11 яңа мәктәп бинасы, ел ахырына кадәр 10 яңа балалар бакчасы ачыла. Әлеге мәгариф оешмаларында 10 меңнән артык укучы өчен урын булдырыла. Бу хакта Татарстан мәгариф һәм фән урынбасары - Мәгариф өлкәсендә күзәтчелек һәм контроль департаменты җитәкчесе Рәмис Мөҗипов хәбәр итте.

«Быел гамәлдәге мәктәп тормышына нык йогынты ясый торган тамырдан үзгәрешләр планлаштырылмый. Әмма кайбер профессиональ үзгәрешләр бар дип әйтергә була. Шулай итеп, инфраструктура үзгәрешләре планлаштырылган – укучылар өчен яңа урыннар барлыкка килә. Аңа яңа мәктәпләр һәм балалар бакчалары төзү нәтиҗәсендә ирешелә», - диде спикер.

Мөҗипов сүзләренчә, 1 сентябрьгә 49 мәктәптә, 20 балалар бакчасында, 4 урта һөнәри белем бирү бинасында, 14 көллият һәм техникум тулай торагында капиталь ремонт тәмамлана. «Аерым программа буенча ике спорт залы ремонтлана һәм спорт инвентаре белән җиһазландырыла», – дип белдерде ул.

Мәгариф һәм фән министры урынбасары искәрткәнчә, дүрт ел инде республикада Мәктәп ашханәсен ремонтлау программасы гамәлдә, аңа ел саен 1 млрд сум бүлеп бирелә. Быел программага 94 мәктәп ашханәсе кертелгән. Ремонт эшләре 99 процентка тәмамланган.