Хөснуллин Путин йөкләмәсе буенча Курск өлкәсенә килде

Россия вице-премьеры Марат Хөснуллин Президент Владимир Путин йөкләмәсе буенча Курск өлкәсенә килде. Бу хакта ул үзенең телеграм-каналында язган.

«Вакытлыча урнаштыру пунктларында булдым, гражданнарны күчерү, компенсацияләр түләү буенча эш барышын карадым. Губернатор вазифаларын вакытлыча башкаручы Алексей Смирнов белән бергә кешеләргә ярдәм итү һәм югалтуларны киметү өчен тагын нәрсә эшләргә кирәклеге турында фикер алыштык», – дип сөйләде вице-премьер.

Ул шулай ук зыян тигән юлларны һәм социаль объектларны торгызу планын төзү буенча эш алып барылуын билгеләп үтте. Хакимият инфраструктураны оператив рәвештә тәртипкә китерергә әзер булачак, дип вәгъдә итте Хөснуллин.

Бернигә дә карамастан, төбәк үсүен дәвам итәчәк, дип йомгаклады вице-премьер.

Моннан тыш, РФ Хөкүмәте рәисе урынбасары белән Алексей Смирнов Бөек Ватан сугышы елларында һәлак булганнар истәлегенә куелган мемориалга чәчәкләр салды.

«Нәкъ 81 ел элек, 1943 елның 23 августында, Кызыл армия Курск сугышында немец-фашист гаскәрләрен тар-мар итте. Тиздән Курск өлкәсенең икенче тапкыр азат ителүен билгеләп үтәргә сәбәп булачак, дип ышанам!», - дип йомгаклады Хөснуллин.