Башкортстанның беренче Президенты Мортаза Рәхимов турында энциклопедия чыкты

Башкортстан Республикасы Фәннәр академиясендә «Мортаза Рәхимов» энциклопедиясен тәкъдим иттеләр. Башкортстанның беренче Президенты Мортаза Рәхимовка багышланган китап Россиядә дәүләт эшлеклесе турында беренче шәхси энциклопедияләр исәбенә керә. Бу хакта «Башинформ» хәбәр итә.

Энциклопедия Башкортстан Башлыгы Радий Хәбиров указы буенча кыска вакыт эчендә – бер елда булдырылган. Китапны төбәк Башлыгы һәм Рәхимов командасында күп еллар эшләгән шәхесләр беренче булып кулга алган.

«Мортаза Рәхимов» энциклопедиясенең баш мөхәррире – Башкортстан Республикасы Фәннәр академиясе вице-президенты, икътисад фәннәре докторы, профессор Александр Дегтярев.

Басманың тиражы – бер мең данә. Бөтен тиражны, беренче чиратта, үзебезнең мәктәпләргә, гимназияләргә, лицейларга, көллиятләргә, шәһәрләребез һәм район үзәкләребезнең зур китапханәләренә, барлык дәүләт хакимияте органнарына, университетларга, республиканың иҗтимагый һәм мәдәни үзәкләренә җибәрәбез, дигән баш мөхәррир.