Әтнә районы Татарстанда беренче булып урып-җыюны төгәлләде

Татарстанның Әтнә районында урып-җыю кампаниясе тәмамланды. Тагын 42 районда ашлык җыю дәвам итә. Бер гектардан 29,1 центнер уртача уңдырышлылык белән республика буенча барлыгы 2,7 миллион тоннадан артык ашлык җыелды, дип хәбәр итә Татарстан Республикасы Авыл хуҗалыгы һәм азык-төлек министрлыгы матбугат хезмәте.

«Узган ике көндә бөтен республика буенча 167 мең тоннадан артык авыл хуҗалыгы культуралары суктырылды», – дип билгеләп үттеләр министрлыкта.

Әтнә районында 60 мең тоннага якын ашлык җыелган (уртача уңдырышлылык – бер гектардан 34,3 центнер).

Тәтеш районының кайбер хуҗалыкларында уңдырышлылык бер гектардан 41,6 центнердан артып китә.

Кукмара районында уртача уңдырышлылык бер гектардан 37,1 центнерга җитә, ә Кайбыч, Аксубай һәм Тукай районнарында – 35,1 центнердан артык.