Түбән Камада инициативаларны гамәлгә ашыру турында сөйләштеләр

Түбән Кама муниципаль районы башлыгы Рамил Муллин коммерцияле булмаган оешмалар белән очрашты. Муниципалитетның волонтерлар белән уңышлы хезмәттәшлек тәҗрибәләре турында фикер алышты, шулай ук актуаль мәсьәләләр турында сөйләштеләр. Бу хакта Түбән Кама муниципаль районы рәсми сайтында хәбәр ителә.

ТР Иҗтимагый палатасы рәисе Зилә Вәлиева чараның мәртәбәле кунагы булды.«База» креатив индустрияләр үзәге фойесында чарада катнашучыларны Түбән Кама волонтерлык оешмалары каршы алды. «След» эзләү отряды шәһәрдә һәм районда югалган кешеләрне табарга ярдәм итүче элемтә чараларын тәкъдим итте.

Иреклеләр үзәген төрле юнәлеш активистлары тәкъдим итте – экологик, патриотик, хезмәт отрядлары, медицина һ.б.

Лариса Орлова җитәкчелегендәге махсус хәрби операциядәгеләр өчен гуманитар ярдәм җыюны оештыручылар монда да эш белән мәшгуль иде – кунаклар белән бергә егетләр өчен коры душ җыелмалары әзерләделәр.

«Надежда» йортсыз хайваннар фонды җитәкчесе хәзерге вакытта алар ташламалы категориядәге гражданнар өчен йорт хайваннарын бушлай стерилизацияләү белән шөгыльләнүләрен җиткерде. Инде 243 гариза башкарылган һәм шул кадәр үк чиратта тора.

Коммерцияле булмаган оешма хәйриячелек турында гына түгел, ә яңа креатив юнәлешләрне үстерү турында да. Мәсәлән, Түбән Камада Рәис Шәехов җитәкчелегендә велоактивистлар хәрәкәте эшли. Ул кунакларга үз проектының эшчәнлеге турында сөйләде. Нәкъ менә аның активлыгы аркасында шәһәрдә веломузей барлыкка килде, начар күрүчеләр өчен велотандемнарда заездлар һәм веломарафоннар үткәрелә.

Очрашуның рәсми өлешен Түбән Кама муниципаль районы башлыгы Рамил Муллин ачып җибәрде. «Безгә бүген гражданлык институтлары үсешендәге тенденцияләр белән бергә атлау бик мөһим. Күпләр алар өчен кемдер уйлар дип фикер йөртә һәм бу шәһәр үсешен тоткарлый. Әлеге очрашуны бездә уздыруыбызга, тәҗрибә белән уртаклашуыбызга мин бик шат. Минемчә, Түбән Каманың мөмкинлекләре зур һәм халык инициативаларын тормышка ашыруга ярдәм итү юнәлешендә көчле инструментлары бар. Биредә кызыксынучы зур сәнәгать предприятиеләре, бизнес, шулай ук муниципалитет ягыннан зур ярдәм күрсәтелә», - диде Түбән Кама муниципаль районы башлыгы.