Авиакомпанияләргә кул багажын йөртү кагыйдәләрен бозган өчен штраф сала башлыйлар
Административ хокук бозулар турындагы кодексның яңа редакциясендә авиакомпанияләргә пассажирлар, кул йөге, һәм багаж йөртү кагыйдәләрен бозган өчен җәза чаралары язылачак. Бу хакта «РИА Новости» хәбәр итә.
«Россия Юстиция министрлыгының Административ хокук бозулар турындагы кодексның яңа редакциясен әзерләү буенча эше кысаларында, Россия Транспорт министрлыгы тәкъдиме буенча, Административ хокук бозулар турындагы кодекс проектына «Һава транспортында пассажирлар, кул йөге, багаж һәм йөкләр ташу кагыйдәләрен бозу» дигән яңа маддә өстәлде», - диелгән Россия Транспорт министрлыгының сенатор Айрат Гыйбатдиновка җавабында. Җавапны министрлык башлыгы урынбасары Владимир Потешкин имзалаган.
Гыйбатдинов билгеләп үткәнчә, авиакомпанияләрнең кул йөге йөртү буенча бәхәсле чикләүләр кертүе җәмгыятьтә еш кына бәхәсләр туу предметы булып тора, чөнки закон бүгенге көндә авиакомпанияләргә бу өлкәдә пассажирларның хокукларын бозган өчен җаваплылык билгеләми.
Россиядә яңа кодекска үзгәрешләр кертү өстендә 2019 елдан бирле эшлиләр. Юстиция министрлыгы башлыгы Константин Чуйченко билгеләп үткәнчә, яңа законнар җыелмасы проекты хәзерге вакытта ведомствоара килештерү процедурасын уза.