Үзәк банк Россиядә икътисади активлыкның акрынаюы турында хәбәр итте

Агымдагы елның III кварталы башында Россиядә икътисади активлык II квартал белән чагыштырганда уртача темплар белән үсте. Бу хакта РФ Үзәк банкы июль өчен статистик мәгълүматка, оператив индикаторларга һәм сораштыруларга сылтама белән хәбәр итә.

Моннан тыш, июль-август айларында халыкның товарлар һәм хезмәтләр куллануы акрыная башлады, дип билгеләп үттеләр Үзәк банкта.

Җәйнең икенче аеннан халыкка кредит бирүнең акрынаюы күзәтелә – «күбесенчә ташламалы ипотека программаларын гамәлдән чыгару яки яңадан форматлаштыру сәбәп булган». Бу фонда корпоратив кредит бирү югары темплар белән арта бара, дип ачыклык керттеләр Үзәк Банкта.

Июльдә һәм августта бәяләр югары темплар белән үсте, моңа шул исәптән бизнесның һәм халыкның инфляциягә өметләре дә йогынты ясады, алар «әлегә арта бара». Россия банкы бәяләвенчә, «июльдә еллык инфляция, мөгаен, үзенең иң югары ноктасына җиткәндер».

Үзәк банкта икътисадның балансланган үсешенә билгеләнгән тренд сакланса, инфляция басымы кимүгә барачагына өмет белдерделәр. «Әмма бу процесс тиз булмаячак дип уйларга барлык нигезләр дә бар», — диделәр регулятор матбугат хезмәтендә.