БРИКС саммиты алдыннан Сөембикә манарасында авариягә каршы эшләрне тизәйттеләр
Казанда унга якын мәдәни мирас объекты 2024 елның октябрендә узачак БРИКС илләре саммитына әзерләнә. Сөембикә манарасында авариягә каршы эшләр тизәйтелгән темпта алып барыла, дип хәбәр итә РБК.
«Хәзерге вакытта ярыкларны спираль анкерлар белән томалау, фундаментны ныныту бара, инъекцион гидроизоляция салынды. Объектлар күп, әмма барысын да эшләп өлгерербез, дип уйлыйм», - дип сөйләде ТР Мәдәни мирас объектларын саклау комитеты рәисе Иван Гущин.
Манараны яңартуның беренче этабында авариягә каршы эшләр башкарылачак, ә икенче этабында бинаның эчке һәм тышкы ягы реставрацияләнәчәк.
Гущин билгеләп үткәнчә, ун мәдәни мирас объектын ремонтлау һәм реставрацияләү дәвам итә. Казан Ратушасында, Казан Кремлендәге Юнкер училищесында, Карл Маркс урамындагы Грачев йортында эшләр тәмамланган.