Татарстан яшьләре Байконурга бара һәм «Союз-МС-26» кораблен җибәрүдә катнаша

Татарстан яшьләр оешмалары вәкилләре Байконурга барачак. 11-13 сентябрьдә биредә «Халыклар дуслыгы!» фестивале була. Татарстан Яшьләр эшләре министрлыгы матбугат хезмәте шул хакта хәбәр итә.

Программа кысаларында Татарстан яшьләре «Байконур» космодромыннан «Союз — МС-26» Россия корабын җибәрүдә катнаша. Шулай ук космодромның музей комплексы, «Буран» корабы буйлап экскурсия, Гагарин стартының беренче мәйданчыгына, Сергей Королев һәм Юрий Гагарин мемориаль йортларына, Байконур шәһәре һәм «Коркыт ата» мемориаль комплексына сәфәр планлаштырылган.

«Халыклар дуслыгы!» фестивале кысаларында Татарстан вәкилләре, костюмнар киеп, театральләштерелгән тамаша белән Дуслык әйлән-бәйләненә кушыла һәм «Из глубины веков!» милли ашлар күргәзмәсендә милли ашларның концепциясен һәм барлыкка килү тарихын тәкъдим итәчәк.

Яшьләр делегациясенең Казахстанга сәфәре Татарстан Рәисе Рөстәм Миңнеханов һәм Бөтендөнья яшьләр фестивале ярдәмендә мөмкин булды, анда республика Казахстан яшьләренә мәдәни шефлык күрсәтте.

Аңа Татарстан Республикасында дәүләт яшьләр сәясәтен гамәлгә ашыру программасы кысаларында үзләрен күрсәткән 15 активист керде. Алар - Яшьләр дипломатиясе академиясе, Иҗади яшьләр академиясе волонтерлары, иҗтимагый яшьләр хәрәкәтләре актвистлары, Татарстан башкаласы балалар һәм яшьләр эшләре комитетының яшь хезмәткәрләре һәм Казан яшьләре, Бөтендөнья яшьләр фестивале делегатлары.

Татарстан яшьләренең фестивальдә катнашуы мәдәни шефлык программасының алга таба да гамәлгә ашырылуын күрсәтә, шулай ук Халыкара дуслык клубы - Бөтендөнья яшьләр фестиваленең мирас-проекты эшенә ярдәм итә. Аны Россия Президенты Владимир Путин кушуы белән Яшьләр эшләре буенча федераль агентлык 2024 елдан гамәлгә ашырыла.