Мөхәммәтшин һәм Шәймиев Татарстан дәүләт хезмәте ветераннары белән очрашты
Ветераннар хезмәте нәтиҗәсендә Татарстан заманча үсеш дәрәҗәсенә ирешә һәм күп юнәлешләрдә лидер була алды. Аларның туган җиргә мәхәббәте һәм сайлаган эшләренә тугрылыгы бүгенге көндә дә горурлык уята торган күп кенә язмышны хәл итә торган карарларга нигез салды. Бу хакта ТР Дәүләт хезмәте ветераннары белән очрашуда ТР Дәүләт Советы Рәисе Фәрит Мөхәммәтшин белдерде. Республика парламенты матбугат хезмәте шул хакта хәбәр итә.
Халыкара өлкәннәр көненә багышланган тантаналы кабул итү Казан Ратушасында узды. Аның кысаларында республиканың социаль-икътисади үсешенә зур өлеш керткән ветераннар хөрмәтләнде.
«Сез Татарстан өчен төрле дәүләт һәм җәмәгать постларында күп нәрсә эшләдегез. Үз хезмәтегез белән сез язмышны хәл итә торган казанышларга нигез салдыгыз, без бүген дә шуның нәтиҗәләре белән горурланабыз. Сезнең эшкә тугрылыгыгыз һәм туган җирегезне чиксез яратуыгыз республикага заманча үсеш дәрәҗәсенә ирешергә, күп юнәлешләр буенча алдынгы урыннарны алырга мөмкинлек бирде», - дип ассызыклады Мөхәммәтшин.
Ул искәрткәнчә, хәзер Татарстан Россиянең терәк төбәге булып тора. Биредә сәнәгать, авыл хуҗалыгы уңышлы үсә, халыкның тормыш сыйфатын яхшыртуга юнәлдерелгән төрле проектлар һәм программалар гамәлгә ашырыла, дөньякүләм дәрәҗәдәге зур чаралар оештырыла. Октябрьдә узачак БРИКС дәүләт башлыклары саммиты да шуларның берсе була.
ТР Дәүләт Советы Рәисе билгеләп үткәнчә, күп кенә ветераннар, яшь булуларына карамастан, Иҗтимагый палаталар һәм советлар составында үзләренең бай һөнәри тәҗрибәләре белән уртаклашалар, яшьләрне тәрбияләү эшендә ышанычлы союздашлар булып торалар.
Очрашуда катнашучыларга шулай ук Татарстан Дәүләт Киңәшчесе, Россия Федерациясе Хезмәт Герое Минтимер Шәймиев мөрәҗәгать итте.
«Хезмәт сөючән күпмилләтле халкыбызның бердәм хезмәте нәтиҗәсендә Татарстан - Россиянең әйдәп баручы субъектларының берсе. Республика казанышларында сезнең һәркайсыгызның өлеше булуына мин бик шат. Мин үз киңәшләребез һәм тәҗрибәбез белән киләчәктә дә, мөмкин булганча, Татарстанга ярдәм итәрбез дип өметләнәм. Без моны булдырабыз!»—дип ассызыклады ул.
Шулай ук Казан Ратушасында дәүләт бүләкләрен тапшыру тантанасы узды. Хәбир Иштирәков «Дуслык» ордены белән бүләкләнде. Галина Лоцманова һәм Рәмзия Сәгыйева «Татарстан Автономияле Совет Социалистик Республикасы оешуга 100 ел» медальләренә лаек булды.
Тантаналы чарада ТР Рәисе Администрациясе җитәкчесе Әсгать Сәфәров, ТР хезмәт, халыкны эш белән тәэмин итү һәм социаль яклау министры Эльмира Зарипова, ТР Рәисе Администрациясе, иҗтимагый ветераннар оешмалары вәкилләре катнашты.