Казан заводы директоры Акчурин турында: Һәр инструмент аның кулына яраклаштырып ясалды

Казан медицина-инструменталь заводы директоры Нур Шакиров табиб Ренат Акчурин ярдәмендә булдырылган һәр хирургия инструменты индивидуаль рәвештә профессорның кулына яраклаштырылып ясалды, дип белдерде. Исегезгә төшерик, Россиянең элеккеге президенты Борис Ельцинга операция ясаган танылган кардиохирург 6 октябрьдә 78 яшендә үлде.

«Һәр инструментны индивидуаль рәвештә профессорның кулына яраклаштырып эшләдек, чөнки бармаклар инструментны тоярга тиеш», - дип Шакиров сүзләрен китерә «Известия» газетасы.

Мисал итеп ул бер хирургия инструментын китерде. Аны ясаганда, кешенең бармакларының кысу һәм тоып алу көчен исәпкә алганнар, ә алар безнең һәрберебезнеке индивидуаль.

Спикер билгеләп үткәнчә, мондый вак кына детальләр операцияне башкару сыйфатына йогынты ясарга мөмкин. Акчурин моны белгән, хирургия инструментлары ясаучы инженерлар һәм технологлар белән шәхсән аралаша торган булган.

Исегезгә төшерәбез, Ренат Акчуринны 9 октябрьдә Троекуровский зиратында җирләячәкләр.

Акчурин – йөрәккә һәм кан тамырларына барлык төр операцияләрне оста башкарган югары квалификацияле кардиохирург. 1996 елда Ельцин аның пациенты булганнан соң, Акчуринның исеме бөтен ил буйлап танылды. Табиб аңа коронар шунтлау ясады.

Акчуринның иң мөһим казанышларының берсе –коронар артерияләргә операция ясаганда югары нәтиҗәле микрохирургия техникасын куллануны безнең илдә һәм Европада клиник практикага беренче тапкыр кертү.