Уфаның «Нур» дәүләт татар театрында татар яшьләре форумы — «Милләт киләчәге» узды
26 октябрьдә Уфаның «Нур» дәүләт татар театрында татар яшьләре форумы — «Милләт киләчәге» узды. Бу хакта Бөтендөнья татар конгрессы матбугат хезмәте хәбәр итә.
Форумның пленар утырышында Башкортстан һәм Татарстан яшьләр оешмалары җитәкчеләре, Башкортстанның татар җәмәгатьчелек оешмалары җитәкчеләре, ике республикадан яшь активистлар катнашты. Форум ахырында Башкортстандагы татар яшьләре оешмасы вәкиле Дарина Ергизова форум резолюциясен укыды, һәм резолюция проекты кабул ителде.
Форумда шулай ук Бөтендөнья татар яшьләре форумы рәисе Райнур Хәсәнов һәм Бөтендөнья татар конгрессының яшьләр белән эшләү комитеты җитәкчесе Алмаз Хәлиуллин катнашты.
Форум кысаларында яшьләр өчен әһәмиятле һәм кызыклы темаларга багышланган түгәрәк өстәлләр оештырылды.