Татар теле укытучысы Ләйлә Гарифҗанова: Татар теленә игътибар арту – зур сөенеч

Казан шәһәре Идел буе районының «19нчы гимназия» муниципаль автономияле гомуми белем учреждениесенең татар теле һәм әдәбияты укытучысы Ләйлә Гарифҗанова татар теленә игътибар артуның зур сөенеч булуын әйтте. Бу хакта ул Казан Ратушасында 2024 елда Казан мэриясе оештырган милли чараларга һәм проектларга багышланган түгәрәк өстәлдә сөйләде.

«Ел дәвамында татар теле курсларын үткәрдек. Беренчесе – муниципаль хезмәткәрләр өчен, калганнары барлык теләүчеләр өчен узды. Соңгы курста махсус Ләйлә Гарифҗанованы чакырдык. Һәр курста икешәр төркем оеша: башлангычлар һәм дәвам итүчеләр. Яңалыкны социаль челтәрләрдә урнаштырабыз, ике сәгать эчендә урыннар тула! Аннан шалтырата башлыйлар. Чөнки татар телен белергә теләүчеләрнең ихтыяҗы зур», - диде түгәрәк өстәлне алып баручы Айсылу Лерон.

Ул катнашучыларның барысы да ахырга кадәр калмавын әйтте. «Укырга теләүчеләр курсларга йөреп бетерә, без аларга Рәхмәт хатлары тапшырабыз. Алар белемнәрен күрсәтеп, гади генә җөмләләр белән булса да, татарча җөмләләр төзи», - диде ул.

«Татар теле курсларын алып бару минем өчен беренче тәҗрибә иде. Моңарчы һәрвакыт балалар белән эшләдем, онлайн һәм офлайн дәресләр укыта идем. Курслар тәмам булганнан соң, татар теленнән өстәмә дәресләр сорап мөрәҗәгать итүчеләр бик күп булды. Араларында әлеге курста укучылар да бар. Минем өчен татар теленә игътибар арту – зур сөенеч», - диде Ләйлә Гарифҗанова.

«Ләйләне котлыйбыз! Киләчәктә уңышлар телим. Алга таба да проектларда актив рәвештә катнашырга риза булырсың дип өметләнәбез», - диде Казан шәһәре Башкарма комитеты җитәкчесе урынбасары Гүзәл Сәгыйтова.