Миңнеханов Алиевка: Татарстан предприятиеләре Азәрбайҗанда үз урынын киңәйтергә әзер

Татарстанның кайбер компанияләре Азәрбайҗанда күптәннән актив эшли. Алар республикада үз урынын киңәйтергә әзер, дип белдерде ТР Рәисе Рөстәм Миңнеханов Азәрбайҗан Президенты Илһам Алиев белән очрашуда. Бу хакта республика Рәисе матбугат хезмәте җитәкчесе Лилия Галимова хәбәр итте.

Республика җитәкчесенең Бакуга сәфәре Илһам Алиев чакыруы буенча уза. Бу турыда Казанда БРИКС саммиты вакытында килештеләр.

«Без дустанә Россия-Азәрбайҗан мөнәсәбәтләре кысаларында сезнең ил белән хезмәттәшлекне киңәйтү мөмкинлеген югары бәялибез», - диде Татарстан Рәисе.

Ул товар әйләнеше күрсәткечләренең артуына игътибар итте. Әгәр 2023 ел нәтиҗәләре буенча күрсәткеч 102 миллион доллар тәшкил иткән булса, агымдагы елның 9 аенда үсеш 80,8 миллион доллар булды.

«Безнең сәүдә-икътисади һәм инвестицион хезмәттәшлекне киңәйтү өчен зур потенциалыбыз бар. Татарстанның кайбер предприятиеләре Азәрбайҗанда күптән эшли. Алар үз урынын киңәйтергә әзер», - диде Миңнеханов.

Аның фикеренчә, сәүдә әйләнешен үстерү өчен перспективалы вариант елга һәм диңгез юллары булырга мөмкин, аларның потенциалы әлегә кулланылмаган диярлек. Эшне шул исәптән Идел-Кама бассейны кысаларында да башкарырга мөмкин. Сүз суыткыч җайланмалар, авыл хуҗалыгы техникасы, нефть-газ һәм компрессор җайланмалары, автотранспорт өчен шиннар китерү турында бара.

«Сезне күрүемә бик шатмын. Казанда килешенгәнчә, елны Бакуда очрашу белән тәмамлыйбыз», — диде Илһам Алиев.

Сүзен йомгаклап, Рөстәм Миңнеханов әңгәмәдәшенә Азәрбайҗанда татар җәмәгатьчелегенә күрсәткән ярдәме өчен рәхмәт белдерде. Хәзерге вакытта илдә якынча 18 мең ватандашыбыз яши. Үз чиратында, Татарстан тормышында азәрбайҗаннарның милли-мәдәни мохтарияте вәкилләре актив катнаша. Халык санын алу мәгълүматлары буенча республикада 18 мең кеше яши.