Татарстанда Гаилә елы нәтиҗәләренә багышланган телемарафонда 50 пар һәм 100 бала катнаша

22 декабрьдә Татарстанда Россиядә Гаилә елы нәтиҗәләренә багышланган «Яңа ел белән, гаилә!» 12 сәгатьлек телемарафоны була. Бу хакта «Татарстан – Яңа гасыр» телерадиокомпаниясе хәбәр итә.

50 гаилә һәм 100 бала вакыйганың кунаклары булачак. Тамашачылар геройларның танышу тарихлары турында беләчәк, шулай ук бер пар белән бергә туйларының еллык бәйрәмен билгеләп үтәчәк.

Трансляция «ТНВ-Татарстан» һәм «ТНВ-Планета» телеканалларында 9.00 сәгатьтә башлана. Эфирда өч пар алып баручы - Ассоль Мөхәммәтҗанова һәм Идел Кыямов, Светлана Звонарева һәм Илдар Кыямов, Алия Хәйретдинова һәм Иван Остроумов эшләячәк. Моннан тыш, «ШАЯН ТВ» телеканалының яшь алып баручылары да студия кунаклары һәм тамашачылар белән аралашыр дип көтелә.

Марафон вакытында Кыш бабайлар парады һәм Яңа ел тылсымчысы өчен тавыш бирү дә үткәрелә. Аны тамашачылар үзләре сайлаячак.