Татарстанның Россиядәге Тулы вәкаләтле вәкиллегендә елга нәтиҗә ясадылар

Иҗтимагый берләшмә җитәкчеләре советы һәм Мәскәү төбәге татар җәмәгатьчелеге активы очрашуында Мәскәүдә татар телен саклау, махсус хәрби операциядә катнашучыларга ярдәм күрсәтү һ.б. эш юнәлешләре хакында фикер алыштылар. Чара 2024 елның икенче яртыеллыгына нәтиҗәләр ясау һәм 2025 елдагы планнарга, шул исәптән Җиңүнең 80 еллыгын бәйрәм итүгә багышланды, дип хәбәр иттеләр Татарстанның Россиядәге Тулы вәкаләтле вәкиллеге матбугат хезмәтендә.

Очрашуда Татарстанның Россиядәге тулы вәкаләтле вәкиле Равил Әхмәтшин катнашты. Чарада хәрбиләргә ярдәм күрсәтү мәсьәләләре, Галимҗан Ибраһимов исемендәге Тел, әдәбият һәм сәнгать институтының электрон проектлары, гаммәви мәгълүмат чараларының укучылар һәм язылучылар (аерым алганда, социаль челтәрләрдә) белән эшләве, шулай ук «Татарстанның эшлекле партнерлары» форумы нәтиҗәләре хакында фикер алыштылар.

Моннан тыш, Равил Әхмәтшин Мәскәү өлкәсе Төбәк татар милли-мәдәни автономиясенең элекке җитәкчесе Фәрит Мохтасаровка рәхмәт белдерде. 15 декабрьдә әлеге вазифаны Фаил Ибәтов били, ул элегрәк рәис урынбасары вазифасын башкарды.