Әлбир хәзрәт Крганов Чувашия мөфтие вазифасыннан киткән
Бүген Чувашиянең Шыгырдан авылындагы «Өч сәхәбә» исемендәге мәчетендә Чувашия Республикасы мөселманнары Диния нәзарәтенең 30 еллыгына багышланган корылтае узган. Корылтайда күтәрелгән төп мәсьәлә – төбәкнең яңа мөфтиен сайлау.
- Әлбир Крганов 1994 елдан башлап Чувашия Республикасы мөфтие вазифасын үти. Хәтта 2016 елда Россия мөселманнары Дини җыены башлыгы итеп билгеләнгәннән соң да, ул Чуашстан мөфтие вазифаларын башкаруын дәвам итте.
Корылтайдагы чыгышында Әлбир Крганов Россия мөселманнары Дини җыены тарафыннан координацияләнә торган федераль социаль әһәмиятле проектларны гамәлгә ашыруга бәйле рухи һәм административ эшнең җаваплылыгы һәм күләме шактый артуын билгеләп үткән. Шул сәбәпле ул үзен Чувашия Республикасы мөселманнары Диния нәзарәте мөфтие вазифасыннан азат итүләрен сорап чыга.
Чувашиянең яңа мөфтие итеп Ильяс хәзрәт Сафиянов билгеләнчәк. Моңа кадәр ул Чувашия Республикасы мөфтиенең беренче урынбасары вазыйфасын башкарган. Әлбир хәзрәт Крганов аны исламның традицион юнәлешен дәвам итүче буларак тәкъдим итте һәм бу вакыт эчендә үзен тәҗрибәле, профессиональ җитәкче буларак танытуын билгеләде.