Чернышенко: 2025 елның апреленнән мигрантларның балалары рус теленнән тест бирә башлый

Киләсе 2025 елның 1 апреленнән бөтен Россиядә мигрантларның балаларын мәктәпкә кабул итү өчен рус теленнән тест уздыра башлаячаклар. Бу хакта РФ вице-премьеры Дмитрий Чернышенко сөйләде, дип хәбәр итә РИА Новости.

Ил Хөкүмәте башлыгы урынбасары сүзләренчә, хәзерге вакытта Мәгариф һәм фән өлкәсендә күзәтчелек федераль хезмәте (Рособрнадзор) методик материаллар һәм тестлау системаларын һәм бәяләү критерийларын әзерләү эшен тәмамлый, чөнки «төрле сыйныфлар өчен төрле дәрәҗәдә тестлаштыру таләп ителәчәк».

Россия мәктәпләренә бер елда 155 меңгә якын мигрант баласы укырга килә, диде Чернышенко.

Моңарчы РФ Дәүләт Думасы чит ил гражданнарының рус телен белмәүче балаларын мәктәпләргә кабул итүне тыючы закон кабул итте.

Шул ук вакытта Казанда мигрантларның балалары өчен рус телен өйрәнү курслары барлыкка килергә мөмкин. Алар булачак беренче сыйныф укучылары өчен генә түгел, өлкәнрәк балалар өчен дә булыр, дип планлаштырыла.