Әюпова Камал театрының яңа бинасы ачылу вакытын игълан итте

Казанда Галиәсгар Камал исемендәге Татар театрының яңа бинасында беренче чаралар 2025 елның беренче өч аенда үткәрелә башлый. Җәйгә исә театр тулы көчкә эшли башлаячак. Бу хакта бүген ТР мәдәният министры Ирада Әюпова #ТатарстанОнлайн эфирында хәбәр итте.

«Бүгенге көндә объект файдалануга тапшырылган. Без аны кабул иттек, исәпкә куйдык, хәзер бинада җайлашу процессы бара. Яңа фатирга күченгәч, әлбәттә, җайлашу, күнегү, савыт-сабаны тезеп кую, җиһазларны урнаштыру өчен күпмедер вакыт кирәк була. Бездә хәзер яңа бинаны Камал театры ихтыяҗларына җайлаштыру процессы бара», - дип сөйләде ул.

Объектны файдалануга тапшыру – беренче адым гына. Якындагы биш елда иҗат коллективы яңа бинада җайлашачак. Техник мөмкинлекләргә килгәндә, яңа мәйданчык - драматургия күзлегеннән караганда илдә генә түгел, бөтен дөньяда иң заманча һәм прогрессив мәйданчыкларның берсе, диде Әюпова.

«Драма театрлары – театр сәнгатенең аерым юнәлеше. Ул традицион мәдәниятнең бик күп катламнарын – телне, яшәү рәвешен һәм кыйммәтләрне саклап калуга хезмәт итә. Төрле максатчан аудиторияләрнең ихтыяҗларына җавап бирәчәк һәм мәдәниятебезнең витринасы булачак киңлек булдыру бик мөһим», - диде министр.

Аның сүзләренчә, бу театр сәнгатен презентацияләү өчен киңлек кенә булмаячак. Биредә барлык татар һәм милли театрларның театр җәмәгатьчелеге өчен фәнни-белем бирү проектлары тормышка ашырылачак. Мәйданчык үзенчәлекле мәдәни-агарту үзәге, креатив индустрияләрне үстерү урыны булачак. Моннан тыш, биредә төбәкара һәм халыкара проектлар гамәлгә куелачак.

Камал театрының иске бинасын куллануга килгәндә, Әюпова «мөрәҗәгатьләр күп, әмма карарлар эзлекле рәвештә кабул ителәчәк» дип билгеләде.