Махсус хәрби операция ветераннары татарстанлыларга мөрәҗәгать итте

Татарстанның Биектау районыннан махсус хәрби операция ветераннары республика халкын Яңа ел белән котлады.

Аларның кайсыдыр алгы сызыкта булган, кайберләре контракт буенча хезмәт иткән. Алар өчен инде махсус операция төгәлләнде, бөтенесе дә өйләрендә. Сугышчан иптәшләренә, аларның гаиләләренә ярдәм итү һәм балаларга патриотик тәрбия бирүдә үз өлешләрен кертү өчен хәрбиләр берләшергә һәм «Махсус хәрби операция ветераннары берлеге»н төзергә карар кылган.

«Биектау районы буенча Махсус хәрби операция ветераннары берлеге барыгызны да Яңа ел белән тәбрик итә. Сезгә нык сәламәтлек, мәхәббәт, бәхет, гаилә иминлеге, тыныч күк йөзе телибез. Быел хәрби операция тәмамлансын һәм барлык уллар, ирләр, әтиләр өйләренә әйләнеп кайтсын иде», - диелә хәбәрдә.

1 гыйнвардан Татарстанда РФ Саклану министрлыгы белән контракт төзүчеләргә 2,2 миллион сум акча бирелә. Акчаның күләме арту республикада түләүләр күтәрелүгә бәйле.

РФ Кораллы көчләре сафларында контракт буенча хезмәт итү, шулай ук премияләр, ташламалар һәм түләүләр турында heroes-tatarstan.ru сайтында яки 117 телефоны буенча белергә була. Шулай ук Контракт буенча хәрби хезмәткә сайлап алу пунктына (1нче разряд) мөрәҗәгать итәргә мөмкин. Адресы: Казан, Аэропорт урамы, 1/40; телефоны: (843) 221-44-52. Моннан тыш, 8 800 222 59 00 номеры буенча мөрәҗәгать итәргә була.