Магнитогорск шәһәрендә «Пәйгамбәр дөньясы» исемле балалар конкурсы үтте

27 декабрь көнне Магнитогорск шәһәренең «Сәхия» мәчетендә «Пәйгамбәр дөньясы» дигән балалар конкурсы оештырылды. Чарада мөселман гаиләләреннән 40ка якын бала катнашты. «Сәхия» мәчете иман-хатыйбы Ильяс Гафаров билгеләп үткәнчә, бу вакыйга игелек һәм эчкерсезлек бәйрәменә әверелде, чөнки ул балаларны җылы һәм дустанә иҗади ярышта берләштерде.

Катнашучылар берничә юнәлеш буенча көч сынаштылар, бу исә һәр балага үз сәләтен күрсәтергә мөмкинлек бирде. Конкурс «Коръән уку», «Пәйгамбәр турында шигырьләр», «Пәйгамбәргә хат», «Пәйгамбәр турында хикәяләр», «Ислам турында рәсемнәр» һәм «Азан» (малайлар өчен) номинацияләрендә үтте. Балалар тарафыннан Пәйгамбәребезгә (саллаллаһу галәйһи вә сәлләм) язылган хатлар аеруча дулкынландыргыч һәм эчкерсез килеп чыккан иде, диелә хәбәрдә.

Ярыш нәтиҗәләренә карамастан, барлык балаларга да истәлекле бүләкләр тапшырылды. Бу конкурсны куанычлы һәм истә калырлык вакыйга итте. Төрле номинацияләрдә җиңеп чыгучылар исә аерым бүләкләр белән билгеләп үтелде.