Татарстанда Кама елгасында адашкан балыкчыны коткардылар
Чистай районында адашкан балыкчыны коткардылар. Бу хакта «Татар-информ»га Россия Гадәттән тыш хәлләр министрлыгының ТР буенча Баш идарәсе матбугат хезмәтендә хәбәр иттеләр.
Лениногорскидан 66 яшьлек ир-ат иртән иптәше белән Камага балык тотарга килгән. Анда алар аерылышкан, аннары яр буенда очрашырга тиеш булганнар. Көндезге сәгать өчтә ир-ат үзенең дустына шалтырата һәм очрашу урынына баруын әйтә, әмма барып җитми һәм шалтыратуларга җавап бирми башлый. Шуннан соң балыкчының иптәше ашыгыч хезмәтләр чакыруының бердәм номерына шалтырата.
Коткаручылар Кубассы авылыннан ерак түгел ир-атны тапканнар, шуннан соң ярга китергәннәр һәм полициягә тапшырганнар.