Казан аэропортын самолетлар кабул итү һәм җибәрү өчен яптылар

Казан аэропортында самолетлар кабул итү һәм җибәрүгә вакытлыча чикләүләр кертелгән. Бу хакта Росавиация хәбәр итте. Моннан тыш, Чебоксар аэропортында да чикләүләр гамәлдә.

Пассажирлардан утыру өчен урыннарга әйберләр һәм багаж куймауларын, өлкән кешеләргә, хатын-кызларга һәм балаларга урын бирүләрен, әдәпле булуларын сорыйлар. Аэропорт хезмәтләре көчәйтелгән режимда эшли.

Исегезгә төшерик, республикада төнге 1:42 сәгатьтән бирле пилотсыз очкыч һөҗүме куркынычы режимы гамәлдә. Кичә, 1 гыйнварда, Татарстанда шундый ук режим җиде сәгатьтән артык – Мәскәү вакыты буенча 08:06 сәгатьтән 15:12 сәгатькә кадәр гамәлдә булды. Казан һәм Түбән Кама аэропортларында һава судноларын кабул итү һәм җибәрүгә вакытлыча чикләүләр кертелде.