Казан шәһәре Думасы депутаты «Теләкләр чыршысы»нда катнашкан өч баланың теләген үтәде

«Бердәм Россия» партиясенең Казан бүлекчәсе башкарма секретаре, Казан шәһәр Думасы депутаты Тәнзилә Ракова «Теләкләр чыршысы» хәйрия акциясенә кушылды һәм өч балага бүләкләр тапшырды. Бу хакта партиянең Татарстан төбәк бүлеге матбугат хезмәте хәбәр итә.

Ракова Казанның Вахитов һәм Идел буе районнары администрацияләрендә чыршыдан балаларның хыяллары язылган шарларны алган.

Бүләкләр тапшыру тантанасы шулай ук Яңа ел чыршысы янында узган. Анда балалар һәм аларның ата-аналары җыелган. Депутат акциядә катнашучыларга балалар өчен махсус компьютерлар һәм уенчык ашханә җыелмасын бүләк иткән.

«Мондый инициативалар социаль әһәмияткә ия. Яңа ел – ул гаилә, өмет һәм игелек бәйрәме. Бу вакытта игелеккә мохтаҗ кешеләргә игътибар бирү, балаларга шатлык һәм могҗизага ышаныч бүләк итү бик мөһим», – дип ассызыклады Тәнзилә Ракова.