Татарстанда Казан – Оренбург һәм Казан – Ульяновск трассалары буенча хәрәкәт чикләнде

8.00 сәгатьтән Татарстанда Казан – Оренбург (Әлмәткә кадәр участокта) һәм Казан – Ульяновск федераль автомобиль юллары буенча автобуслар һәм йөк автомобильләре хәрәкәте вакытлыча чикләнгән. Бу хакта ТР Дәүләт автоинспекциясе хәбәр итә.

Күрсәтелгән трассалар буенча йөк машиналары һәм автобуслар хәрәкәте республикада һава шартлары яхшырганчы чикләнгән булып калачак.

Юлда штаттан тыш хәлләр килеп чыккан очракта ярдәм сорап 8 (843) 533-38-88 телефоны буенча мөрәҗәгать итәргә кирәк.

Кичә үк Самара өлкәсендә М5 автоюлы участокларында һава торышы начар булу сәбәпле хәрәкәтне вакытлыча чикләделәр.

Элегрәк ТР Гидрометеорология үзәге Татарстанны якшәмбе көнне буран һәм көчле җил каплаячак дип сөйләгән иде. Синоптиклар бәяләвенчә, республикада һава торышының начар булуы нәкъ менә 4 гыйнварга туры киләчәк.