Чаллыда табиблар йөрәге туктаган пациентны робот ярдәмендә коткарган

Чаллыда Ашыгыч медицина ярдәме хастаханәсе табиблары йөрәге туктаган 62 яшьлек Менделеевск кешесен коткарган. Клиника матбугат хезмәтендә хәбәр итүләренчә, ир-атны клиник үлем хәлендә китергәннәр – аның коронар артериясе тыгылып, миокард инфаркты булган.

Реанимация 65 минут дәвам иткән. Табиблар күкрәк читлегенә өзлексез компрессияләр ясаучы Lucas 3 робот-реаниматологын кулланган. Реанимацияне вакытында башлау һәм тотрыклы компрессияләр нәтиҗәсендә баш мие гипоксиясен булдырмый калганнар.

Йөрәк эшчәнлеген торгызганнан соң пациентны үпкәләрне ясалма җилләтү аппаратына һәм йөрәк эшен вакытлыча алмаштырган ЭКМО системасына тоташтырганнар. Аннары рентгенхирурглар тыгылган артерияләргә операция ясаган.

Ир-ат реанимациядә 300 сәгать уздырган, шуларның җиде көне – ЭКМО системасына тоташкан хәлдә. Йөрәк, баш мие һәм башка мөһим органнарның функцияләрен торгызу өчен нәкъ менә шулкадәр вакыт кирәк булган. Хәле тотрыкланганнан соң ир-атны кардиология бүлегенә күчергәннәр. 3 гыйнварда пациентны өенә чыгарганнар, анда ул тернәкләнүен дәвам итә.