Миңнеханов Кукмара металл савыт-саба заводына хезмәт батырлыгы предприятиесе исемен бирде
Кукмара металл савыт-саба заводына «Хезмәт батырлыгы предприятиесе. 1941-1945 еллар» исеме бирелде. Тиешле указга Татарстан Рәисе Рөстәм Миңнеханов кул куйды.
Бу исем предприятиегә Бөек Ватан сугышында җиңүгә зур өлеш керткәне, хезмәт батырлыгы һәм аның хезмәткәрләренең сугыш елларында күрсәткән фидакарьлеге өчен бирелде.
Документта билгеләп үтелгәнчә, завод Бөек Ватан сугышы вакытында хәрби һәм гражданлык продукциясен өзлексез җитештерүне тәэмин иткән.
Заводка 1743 елда нигез салына. Сугыш елларында предприятие фронт өчен арбалар һәм чаналар чыгара, ә аннан соң анда алюминий савыт-саба җитештерү эше җайга салына.
Элегрәк Рөстәм Миңнеханов Татарстанда 2026 елны Хәрби һәм хезмәт батырлыгы елы дип игълан иткән иде.