Гыйнварның беренче ункөнлегендә Татарстанның көнбатышында бер айлык норма кар яуган

Кар, һава температурасы һәм атмосфера басымы үзгәрешләре – Татарстанда бу кышның һава торышы үзенчәлекләре шундый. Республиканың кайбер районнарында кар күп яуды. Бу хакта «Татар– информ»га ТР Гидрометеорология үзәге башлыгы Феликс Гоголь хәбәр итте.

«3-4 гыйнварда кар күп яуды. Гыйнвар башыннан иң күп явым-төшем республиканың көнбатыш өлешендә булды. Казанда – 29,5 мм, Яшел Үзән районында – 33 мм, Кайбыч районында – 26 мм, Арча районында – 31 мм», – дип билгеләп үтте ул.

Гыйнвар аенда Казанда айлык явым-төшем нормасы 45,7 мм, тулаем республика буенча 33,2 мм тәшкил итә. Шулай итеп, төбәкнең көнбатышында явым-төшем күләме айлык нормага якынлаша, ә көнчыгыш өлешендә кар 1,5-2 тапкырга азрак яуган.

Гыйнварның беренче декадасы Казанда климат нормасыннан бераз җылырак булды. Ләкин икенче декада себер циклоны килү сәбәпле, салкын булыр дип көтелә.